Connect with us

Lajme

Mbi dy milionë kërkesa për bileta për ta shikuar debutimin e Ronaldos kundër Messit, ndërsa një biznesmen ka ofruar 2.5 milionë euro për një biletë

Publikuar

me

Janë bërë mbi dy milionë kërkesa për bileta për ta parë ndeshjen e parë të Cristiano Ronaldos në Arabinë Saudite në sfidën kundër Paris Saint-Germainit – bën të ditur ESPN.

Më 30 dhjetor, ish-futbollisti i Manchester Unitedit, Real Madridit e Juventusit, nënshkroi kontratë shumëmilionëshe me klubin Al Nassr me bazë në Riad, ku do të luajë për dy vite e gjysmë.

Mirëpo, pezullimi për dy ndeshje moslojë nga Federata Angleze e Futbollit është bartur në kampionatin e ri, sipas rregullave të FIFA-s, ashtu që ai akoma nuk ka luajtur.

37-vjeçari do të jetë në dispozicion të skuadrës më të mirë që është kombinim i Al Nassr dhe Al Hilal që do të përballet ndaj PSG-së së Lionel Messit më 19 janar (e enjte).

(Foto: Facebook/Al Nassr FC)

Takimi miqësor do të zhvillohet në King Fahd Stadium në kryeqytetin saudit që ka kapacitet prej 68.000 ulësesh, ndërsa burimet e ESPN thonë se bileta janë shitur brenda minutash nga dalja në shitje, derisa mbi dy milionë tifozë kanë bërë kërkesa për ta shikuar nga afër superyllin e futbollit, për më shumë ai do të luajë ndaj rivalit të përbetuar, Lionel Messi.

CR7 dhe Leo janë përballur plot 36 herë me klube dhe përfaqësuese, ndërsa Messi udhëheq me 16 fitore kundrejt 11 triumfeve të Ronaldos (nëntë herë kanë luajtur baras). Argjentinasi i ka shënuar 22 gola në këto takime, kurse portugezi një më pak (21).

Raportohet se një biznesmen saudit ka ofruar 10 milionë rialë (2.5 milionë euro) për një biletë speciale që ta shikojë spektaklin mes dyshes.

Mushref Al-Ghamdi, menaxher i përgjithshëm i grupit të pasurive të paluajtshme AqarOne, është udhëheqës në ankand që përfundon më 17 janar.

Blerësi i kësaj bilete ka të drejtë të marrë pjesë në ceremoninë e fituesit pas ndeshjes, të hyjë në dhomat e zhveshjes dhe të takojë dy futbollistët që prej vitesh kanë konkurruar për të qenë më të mëdhenjtë në botë. /Telegrafi/

Reklama