Dhjetëra persona janë mbledhur këtë të diel në Vjenë, në mbështetje të Republikës së Kosovës pas zhvillimeve të fundit në pjesën veriore të vendit.
“Zgjohu Bashkimi Evropian”, “Nuk duam një tjetër luftë”, “Përkrahni demokracinë e jo autokratët”, ishin disa nga pankartat protestuese.
Protesta është organizuar me iniciativën e Kati Schneeberger, këshilltares së Bashkimit Evropian dhe presidentes së organizatës “Vienna for Europe”.
Ajo ka publikuar në Twitter pamje nga protesta, ndërsa ka bërë thirrje që të marrë fund “mbështetja për autokratët”.
“Sot në Vjenë – në vendin e të drejtave të njeriut – një zë i fuqishëm për demokracinë dhe paqen si dhe mbështetjen për Kosovën. STOP lëshimeve dhe STOP mbështetjes për autokratët. Ju faleminderit të gjithëve. Ishit të mrekullueshëm”, ka shkruar Schneeberger.