Mitrovica e Veriut, Leposaviqi, Zveçani dhe Zubin Potoku – katër komunat veriore me shumicë serbe – kanë marrë zyrtarisht vendimin për t’u tërhequr nga Asociacioni i Komunave të Kosovës.
Bazuar në informacionet zyrtare, ky hap është ndërmarrë me synimin e qartë që këto njësi lokale t’i bashkohen një asociacioni të veçantë të komunave me shumicë serbe në vend.
Ky zhvillim vjen menjëherë pas rikthimit të pushtetit në veri nga ana e Listës Serbe, subjektit kryesor të serbëve të Kosovës që gëzon mbështetjen e Beogradit, pas procesit zgjedhor të tetorit.
Gjatë seancave të para të rregullta të mbajtura këtë të enjte, më 18 dhjetor, u bë edhe zgjedhja e kryesuesve të rinj të kuvendeve komunale: Nemanja Bishevac në Mitrovicë të Veriut, Sërxhan Millosavljeviq në Zveçan, Marko Rakiq në Leposaviq dhe Nemanja Jakshiq në Zubin Potok.
Udhëheqësit e rinj lokalë kishin paralajmëruar që në fillim të muajit dhjetor se do të prapësonin të gjitha vendimet e marra nga kryetarët paraprakë shqiptarë.
Komunat e veriut zyrtarizojnë largimin nga Asociacioni i Komunave të Kosovës, duke sfiduar unitetin e pushtetit lokal në nivel vendi.
Lidhur me këtë situatë, Drejtori i Asociacionit të Komunave të Kosovës, Sazan Ibrahimi, ka deklaruar për mediat se pret që ky vendim të rishikohet, duke theksuar se qëllimi i këtij mekanizmi është fuqizimi i kapaciteteve komunale.
“Asociacioni i Komunave të Kosovës funksionon si mekanizëm vullnetar për mbrojtjen e interesave të autoriteteve lokale në Republikën e Kosovës. Megjithëse kuvendet komunale janë organet më të larta vendimmarrëse, procedura e sotme i lë ato jashtë organizatës sonë”, u shpreh Ibrahimi.
“Dyert tona mbeten të hapura për të gjitha komunat, me qëllim që proceset e lobimit, avokimit dhe ngritjes së kapaciteteve të jenë sa më efektive për të mirën e qytetarëve”.
Ai shtoi tutje: “Shpresojmë që ky qëndrim të ndryshojë së shpejti, në mënyrë që të gjitha komunat e Republikës të përfitojnë nga shërbimet tona. Organizata jonë i shërben autoriteteve lokale, pa u ndikuar nga përkatësia politike e udhëheqësve të tyre”.
Kujtojmë se nën drejtimin e kryetarëve shqiptarë, këto katër komuna ishin bërë pjesë e Asociacionit të Komunave të Kosovës gjatë verës së vitit 2023.
Në lidhje me këtë akt të fundit, është kërkuar një qëndrim edhe nga ministri i Administrimit të Pushtetit Lokal, Elbert Krasniqi, por deri në këto momente nuk ka pasur ndonjë reagim zyrtar./lajmishqip.net