Kryebashkiaku i Qytetit të Nju Jorkut, Zohran Mamdani, i cili më parë ishte zotuar publikisht se do të arrestonte Benjamin Netanyahun nëse ai do të vizitonte qytetin, tani ka deklaruar se nuk e gëzon “autoritetin” e nevojshëm për të ndërmarrë një veprim të tillë, ka raportuar BBC.
Përmes një videoje të publikuar në rrjetet sociale, Mamdani i bëri thirrje zyrtarëve të lartë amerikanë që të veprojnë konform urdhërarrestit të lëshuar nga Gjykata Ndërkombëtare Penale ndaj kryeministrit izraelit për krime të dyshuara luftë.
Nga pikëpamja teknike, nëse Netanyahu do të udhëtonte drejt një shteti anëtar të GJPN-së, ai mund të ndalohej dhe t’i dorëzohej kësaj gjykate – mirëpo Shtetet e Bashkuara të Amerikës nuk janë pjesë e përbërë e GJPN-së.
Presidenti Donald Trump ka deklaruar qartë se Netanyahu nuk do të “arrestohet në asnjë mënyrë, trajtë apo formë” përgjatë kohëqëndrimit të tij në territorin e SHBA-së.
“Ai po zhvillon një luftë kundër Republikës Islamike të Iranit, e cila së fundmi u mori jetën 52,000 protestuesve të pafajshëm, si dhe ka kaluar 47 vitet e fundit duke vrarë ushtarë amerikanë dhe të tjerë”, ka shkruar Trump në një reagim në Truth Social të hënën.
Trump u deklarua pas komenteve që Mamdani bëri gjatë një interviste për mediat e njohura New York Times të shtunën, ku kryebashkiaku pohoi se po zhvillonte “një diskutim aktiv” me organet e zbatimit të ligjit lidhur me mundësinë e zbatimit të urdhrit të GJPN-së.
Të martën, Mamdani sqaroi se ekipi i tij ligjor kishte shqyrtuar “çdo mundësi të disponueshme” sipas kornizës ligjore dhe arriti në përfundimin se “ne nuk zotërojmë autoritet të pavarur ligjor për ta ekzekutuar këtë”.
“Sidoqoftë, qeveria federale e gëzon këtë të drejtë,” nëvizoi Mamdani. “Prandaj unë i bëj thirrje atyre të bashkohen me GJPN-në dhe ta vënë në zbatim këtë urdhërarrest.” /lajmishqip.net
