Dy persona kanë mbetur të plagosur në lagjen “Kodra e Trimave” në Prishtinë.
Lajmin për Ballkani.info e ka konfirmuar zëdhënës i Policisë së Kosovës për rajonin e Prishtinës, Agron Borovci.
“Rreth orës 19:45, është raportuar për gjuajtje me armë zjarri në lagjen “Kodra e Trimave” në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se ngjarja ka ndodhur brenda një dyqani dhe për pasojë dy persona kanë marrë plagë nga arma e zjarrit”, u shpreh Borovci.
Ai ka treguar se të lënduarit janë dërguar në Qendrën Klinike Universitare të Kosovës (QKUK).
“Ndërkohë që të lënduarit janë dërguar në QKUK për trajtimin e nevojshëm mjekësor, policia ka vazhduar me veprime të tjera operativo-hetimore dhe atyre të ekzaminimit me ç’ rast ka gjetur dhe sekuestruar edhe një armë zjarri”, tha ai.
Ai ka potencuar se dy persona janë arrestuar si të dyshuar në lidhje me ngjarjen.
“Dy persona janë arrestuar nga policia nën rrethana që ndërlidhen me ngjarjen, ndërkaq vijon puna për identifikimin e personave të tjerë të implikuar në rast si dhe zbardhjen e plotë të rrethanave të ngjarjes”, tha Borovci./Ballkani.info