Donald Trump njoftoi planet për të vendosur tarifa gjithëpërfshirëse 25% për makinat nga jashtë SHBA-së, disa ditë përpara se presidenti pritet të shpallë tarifa të gjera për mallra të tjera nga e gjithë bota.
“Ajo që ne do të bëjmë është një tarifë 25% për të gjitha makinat që nuk janë prodhuar në Shtetet e Bashkuara”, tha Trump në Zyrën Ovale, shkruajnë mediat e huaja, përcjell Telegrafi.
“Ne fillojmë me një bazë prej 2.5%, që është ajo në të cilën jemi, dhe shkojmë në 25%”.
Në shkurt, Trump hodhi idenë e një tarife prej 25% për automjetet e importuara, por nuk kishte ofruar detaje të tjera.
Të hënën, presidenti la të kuptohet se taksat e industrisë së automobilave mund të vijnë në “të ardhmen shumë të afërt”.
Më 2 prill – një ditë që Trump e ka quajtur “ditë e çlirimit” – presidenti pritet të zbulojë një gamë të gjerë të të ashtuquajturave tarifa reciproke – taksa për mallrat e importuara që administrata Trump argumenton se tatohen në mënyrë të padrejtë nga partnerët tregtarë të SHBA-së.
Trump ka argumentuar prej kohësh se SHBA-ja po mashtrohet nga partnerët e saj tregtarë dhe se tarifat janë zgjidhja më e mirë.
Megjithatë, ai ka shtyrë ose zbutur planet e tij tarifore në disa raste.
Shumë ekonomistë kanë shprehur alarmin, duke paralajmëruar se plani tarifor i presidentit do të rrezikonte rritjen e çmimeve në të gjithë SHBA.
Një studim nga Anderson Economic Group, një konsulent automobilistik, për shembull, zbuloi se tarifat e përgjithshme në Kanada dhe Meksikë rrezikonin të rrisnin çmimet e makinave në SHBA deri në 12,000 dollarë.
