Administrata e presidentit Joe Biden ka publikuar një përmbledhje të raporteve pas veprimit mbi tërheqjen e SHBA-së nga Afganistani që fajësoi paraardhësin e tij Donald Trump, duke thënë se “nuk kishte shenja se më shumë kohë, më shumë fonde ose më shumë amerikanë” mund të kishin ndryshuar rrënjësisht trajektoren.
Sipas mediave të huaja, përcjell Telegrafi, dokumenti prej 12 faqesh pranoi se administrata nxori mësime nga tërheqja.
Biden trashëgoi një operacion të ‘varfëruar’ në Afganistan nga Trump që ‘dëmtoi’ reagimin e tij, tha John Kirby, zëdhënësi i Këshillit të Sigurisë Kombëtare, para gazetarëve në një konferencë për shtyp të enjten.
“Tranzicionet kanë rëndësi. Ky është mësimi i parë i mësuar. Dhe administratës së ardhshme nuk iu lejua shumë”, citohet të ketë thënë Kirby. “Biden mbeti me një zgjedhje ekstreme – të tërheqë të gjitha forcat amerikane, ose të rifillojë luftimet me talebanët”.
Po sipas mediave të huaja, përcjell Telegrafi, raporti thekson “degradimin e qëllimshëm” nga administrata Trump – një akuzë që Kirby tha se i referohet ndër tjerash edhe lirimit të mijëra të burgosurve talebanë, si dhe negociatave të “marrëveshjes së Dohas” për t’i dhënë fund luftës pa qeverinë lokale.
Ndryshe, talebanët rimorën pushtetin në Afganistan në gusht të vitit 2021, ndërsa ish-qeveria e mbështetur nga Perëndimi në Kabul ra me shpejtësi befasuese dhe trupat e fundit amerikane u tërhoqën.
“Amerika është në një bazë strategjike më të fortë, më e aftë për të mbështetur Ukrainën dhe për të përmbushur angazhimet tona të sigurisë në mbarë botën, si dhe konkurrencën me Kinën, sepse ajo nuk po bën një luftë tokësore në Afganistan”, ka thënë ndër tjerash Kirby./Telegrafi