Sekretari i Përgjithshëm i NATO-s, Mark Rutte, ka dhënë detaje të rëndësishme gjatë një interviste për emisionin “Face The Nation” në CBS News, lidhur me kërcënimet e fundit nga Lindja e Mesme.
Gjatë bisedës, ai u ballafaqua me pretendimet e inteligjencës izraelite, sipas të cilave Teherani tashmë zotëron raketa me rreze veprimi që mund të arrijnë deri në Paris, Berlin dhe Londër.
Ky alarm pason sulmin iranian mbi bazën strategjike anglo-amerikane në Diego Garcia të premten mbrëma, një aksion që, ndonëse dështoi, ekspozoi një fuqi goditëse balistike të pakonfirmuar më parë në rrafshin publik.
Sidoqoftë, Rutte u tregua i matur duke deklaruar: “Për momentin nuk mund t’i vërtetojmë këto pretendime, por jemi në fazën e shqyrtimit të tyre të imtësishëm të shërbimeve tona”.
Paralelisht, vjen edhe paralajmërimi nga Sekretari amerikan i Thesarit, i cili pohoi se SHBA-të nuk do të ndalin fushatën kundër fortifikimeve iraniane në Hormuz deri në asgjësimin e tyre total.
Kreu i NATO-s shtoi se vërtetimi i këtyre të dhënave do të shërbente si dëshmi shtesë se ofensiva e Donald Trump ndaj Iranit është qenësore, duke e ndërlidhur këtë direkt me rrezikun nga ambiciet bërthamore të Teheranit.
I pyetur mbi njohuritë e aleancës për kërcënimin ndaj qendrave evropiane, Rutte konfirmoi se Irani është tejet pranë atij kapaciteti, duke potencuar se, qoftë rasti i bazës britanike i vërtetë apo jo, kjo aftësi mbetet një rrezik iminent /lajmishqip.net
