Komisioni Qendror i Zgjedhjeve (KQZ) ka përmbyllur procesin e akreditimit të vëzhguesve për zgjedhjet e parakohshme parlamentare të 28 dhjetorit 2025, duke e çuar numrin total në 19,254 vëzhgues.
Sipas të dhënave të publikuara, pjesa dërrmuese e vëzhguesve vjen nga subjektet politike: 17,614. Pjesa tjetër përfshin 809 vëzhgues nga OJQ-të vendore, 121 nga organizata ndërkombëtare, 554 nga media vendore, 77 nga media ndërkombëtare, si dhe vëzhgues nga institucione shtetërore dhe përfaqësi diplomatike.
Në mbledhjen e fundit, KQZ akreditoi edhe një grup shtesë vëzhguesish, duke listuar edhe disa media vendore e ndërkombëtare që do të jenë të pranishme në terren. Kjo pritet të ndikojë në rritjen e transparencës dhe raportimit në kohë reale, sidomos në komunat ku historikisht ka pasur ankesa për parregullsi.
Në të njëjtën kohë, KQZ ka refuzuar akreditimin e dy organizatave, duke arsyetuar se dokumentacioni i tyre nuk i plotësonte kriteret ligjore ose nuk dëshmonte qartë vërtetësinë e dokumenteve të paraqitura.
Me vetëm pak ditë deri te dita e votimit, numri i madh i vëzhguesve shihet si sinjal se procesi do të jetë nën “lupë” të fortë – nga partitë, shoqëria civile dhe media – dhe çdo incident apo vonesë do të dalë menjëherë në sipërfaqe./lajmishqip.net.