Në intervitën ekskluzive për Rruga Press, Klara Sanduloviq, vajza e politikanit serb Nikola Sanduloviq, i cili u rrëmbe dhe u torturua nga shërbimi sekret serb, tregon për herë të parë fakte tronditëse, që konfirmojnë natyrën brutale të shtetit serb, një rendi ku bota e krimit dhe ajo e politikës ndërkëmbehen në padallueshmëri, duke u vënë në shërbim të njëra-tjetrës.
Ajo flet për gjendjen shëndetësore të babait të saj, duke e cilësuar si shumë të vështirë nga njëra anë, dhe opinionin publik serb nga ana tjetër, që ajo thotë se është tërësisht i kontrolluar nga mediat, të cilat po ashtu drejtohen nga presidenti serb, Aleksandar Vuçiq.
Në këtë mënyrë familja e tyre gjendet mes frikës për shëndetin e Nikola Sanduloviqit dhe një mjedisi pasigurie, duke e konsideruar shumë të mundshme një tentativë tjetër për të eleminuar babain e saj nga shteti serb. Nisur nga kjo, ajo i bën thirrje komunitetit ndërkombëtar dhe secilit aktor të ngrejnë zërin në mbrojtje të figurave si Sanduloviq, ndoshta politikani i vetëm në Serbi që përfaqëson vlerat e demokracisë, paqes, respektit dhe drejtësisë për rajonin.
“Babai im u rrëmbye në fund të janarit nga policia e shërbimit sekret serb dhe arsyeja për këtë ishte akti i tij i vendosjes së luleve te varri i Blerina Jasharit, para një viti, dhe qeveria shkeli secilin ligj dhe pas gjashtë orësh torture dhe rrahje totale ai përfundoi në spital, ai vdiq dy herë, është një deklaratë e shkruar në të dhënat mjekësore ku ata u përpoqën ta risjellin në jetë dhe në këtë gjendje ai në mënyrë urgjente u transportua, u rrëmbye, për në burg, ku ata insistuan ta çojnë në Nish dhe ku u organizuan që të mos dilte nga burgu i gjallë”, shprehet e shqetësuar Klasa Sanduloviq.
Më pas ajo thotë se babai i saj shpëtoi i gjallë, edhe pse tashmë i paralizuar në njërën anë të trupit dhe me brinjë të thyer, vetëm fal reagimit të komunitetit ndërkombëtar, mediave ndërkombëtare, deklaratave të kryeministrave dhe presidentëve të ndryshëm.
Ashtu si babai i saj, edhe Klara Sanduloviq shprehet guximshëm, pavarësisht rrezikut për familjen e saj. Ajo tha se babai i saj ka arritur të identifikojë disa persona brenda objektit të BIA-s ku po torturohej, si pasojë e të cilës ai gati ka ndërruar jetë dy herë dhe vetëm ndërhyrja e mjekëve e ka rikthyer në jetë.
Ajo deklaron se ndër personat që Sanduloviq i ka identifikuar janë terroristi Milan Radoiçiq, i kërkuar ndërkombëtarisht për sulmin terrorist në Banjskë të Kosovës të cilin e udhëhoqi, dhe Goran Rakiq, ish-kryetari i partisë Lista Serpska në Kosovë që dirigjohet nga presidenti serb Vuçiq, e i cili dha dorëheqje vetëm disa ditë pas sulmit të armatosur terrorist në Banjskë.
Klara Sanduloviq konfirmoi atë që tashmë dihej, se krimi dhe politika janë të pashkëputshme për pushtetin në Serbi dhe njerëzit e këtij pushteti që dikur mbanin peng veriun e Kosovës dhe qytetarët aty.
Një kriminel i rangut terrorist si Radoiçiq, ndërkohë që duhej të ishte në burg, e ka derën e hapur të futet në institucionet serbe dhe aty t’i shërbejë Vuçiqit duke rrahur për vdekje kundërshtarët e vërtetë të presidentit serb. Një “politikan” si Goran Rakiq, në mëngjes mashtron e ankohet për “dhunën e kryeministrit Albin Kurti”, në drekë organizon huliganët e Vuçiqit për të goditur trupat e KFOR-it dhe Policisë së Kosovë, ndërsa në darkë takon Radoiçiqin, edhe ky ish-nënkryetar i Lista Serpskas, brenda BIA-s që ta torturojnë së bashku një tjetër politikan, atë të vërtetë dhe pa prapavijë kriminale, Nikola Sanduloviqin.
Gjithçka është e qartë dhe s’ka vend për mëdyshje. Kushdo që akoma shpreson se do shkëpusë Serbinë e Vuçiqit, Radoiçiqit dhe Rakiqit, nga mendësia e krimit dhe brutalitetit duke kënaqur orekse e duke mbyllur sytë do ta ketë shumë të vështirë që së pari t’i besojë gënjershtrat e veta, e pastaj t’i bëjë të tjerët besojnë ato. Kjo tolerancë e dështuar vetëm sa do t’i shtojë episodet e këtilla destruktive, si brenda Serbisë ashtu edhe në vendet fqinje.