Një tren që transportonte trupa dhe pajisje ruse arriti mbrëmë në Bjellorusi, duke ngritur shqetësimet se Moska mund të përdorte territorin e aleatit të saj për të sulmuar nga veriu Ukrainën.
Ministria e Mbrojtjes e Bjellorusisë konfirmoi arritjen e kontingjentit të premten dhe njoftoi se presidenti, Alexander Lukashenko vizitoi bazën ushtarake ku tashmë janë vendosur trupat ruse.
Gjatë takimit, Lukashenko dhe një përfaqësues i paidentifikuar i ushtrisë ruse diskutuan rreth stërvitjeve të përbashkëta ushtarake.
Trupat ruse janë të gatshme të kryejnë detyrat siç është planifikuar, tha përfaqësuesi.
#Belarus The regime handed over a large batch of individual first-aid kits to the Russian military. First, Lukashenka is helping in every way. Second, so is the Russian army lacking even first-aid kits? pic.twitter.com/BwZwYwFCoD
— Hanna Liubakova (@HannaLiubakova) January 6, 2023
Zhvillimi vjen pasi Bjellorusia, e cila ka mbështetur Rusinë në luftën e saj në Ukrainë, tha të enjten se do të merrte më shumë armë dhe pajisje nga Rusia ndërsa të dyja vendet vazhdojnë të forcojnë bashkëpunimin ushtarak.
Ministria bjelloruse e Mbrojtjes njoftoi se qëllimi i krijimit të forcave të përbashkëta është forcimi i sigurisë dhe mbrojtjes së Rusisë dhe Bjellorusisë.
“Fuqia njerëzore, armët, pajisjet ushtarake dhe speciale të Forcave të Armatosura të Federatës Ruse do të vazhdojnë të arrijnë në Republikën e Bjellorusisë”, thuhet në deklaratë.
Të dyja vendet po përgatiten për stërvitje të përbashkëta të aviacionit, njoftoi ministria, pa dhënë detaje shtesë. /Telegrafi