Presidenti i SHBA-së, Donald Trump, ka rikthyer në qendër të vëmendjes çështjen e Grenlandës, duke e cilësuar këtë territor si një pikë kritike strategjike për sigurinë kombëtare amerikane.
Gjatë diskutimeve mbi ofertën e mundshme financiare drejtuar Danimarkës për blerjen e ishullit, Trump u shpreh se ende nuk po flitet për shifra, por konfirmoi gatishmërinë për ta diskutuar këtë aspekt. Megjithatë, siç raporton Sky News, ai lëshoi një paralajmërim të prerë lidhur me fatin e territorit.
“Aktualisht, ne do të ndërmarrim veprime për Grenlandën, qoftë edhe kundër dëshirës së tyre. Nëse nuk veprojmë ne, Rusia ose Kina do ta marrin atë, dhe ne nuk mund të lejojmë që ata të bëhen fqinjët tanë. Preferenca ime është një marrëveshje në mënyrë të lehtë, por nëse kjo dështon, do ta realizojmë në mënyrë të vështirë,” deklaroi 79-vjeçari.
Në krahun tjetër, Danimarka ka mbajtur një qëndrim të palëkundur, duke theksuar se Grenlanda nuk është në shitje dhe se do ta mbrojnë sovranitetin e saj me çdo çmim. Analistët e sigurisë e interpretojnë këtë interes të shtuar të Uashingtonit si një lëvizje vendimtare për të neutralizuar zgjerimin e ndikimit rus dhe kinez në rajonin e Arktikut. /lajmishqip.net
