Deputeti i Lëvizjes Vetëvendosje, Agim Bahtiri, përmes një reagimi në profilin e tij zyrtar, ka adresuar kritika të ashpra ndaj Lidhjes Demokratike të Kosovës, pas dështimit të arritjes së një konsensusi me kryeministrin Kurti për procesin e zgjedhjes së presidentit të ri.
Bahtiri ka vlerësuar se LDK-ja nën udhëheqjen e Lumir Abdixhikut mbetet peng i një mentaliteti të tejkaluar politik. Sipas tij, me gjithë ofertat serioze që përfshinin drejtimin e katër ministrive dhe pozitën e zëvendëskryeministrit të parë, ose alternativën e kryetarit të Kuvendit, pala tjetër zgjodhi refuzimin në vend të bashkëpunimit shtetëror.
Ligjvënësi i LVV-së pretendon se ky refuzim dëshmon mungesën e vullnetit për të qeverisur në interes të të gjithë vendit, duke i akuzuar ata për prirje drejt koordinimit me Listën Serbe. Ai rikujtoi seancën e së premtes, ku sipas tij, opozita bashkëpunoi me Listën Serbe për të bllokuar zgjedhjen e anëtarëve të Gjykatës Kushtetuese, duke tentuar ta mbajnë këtë institucion peng.
Më tej, Bahtiri ka nënvizuar se Albin Kurti dallon rrënjësisht nga figurat politike të së kaluarës, të cilat, sipas tij, realizonin marrëveshje të errëta brenda natës nën ndikimin e Milan Radojçiqit, me qëllim sigurimin e karrigeve të tyre pushtetare.
Ai theksoi gatishmërinë e subjektit të tij për t’u ballafaquar me votën e qytetarëve në zgjedhje të reja sa herë që kjo kërkohet, duke bërë të qartë se nuk do të pranojnë marrëveshje që bien ndesh me interesat e Republikës së Kosovës.
Në mbyllje, Bahtiri u bëri thirrje anëtarëve besnikë të LDK-së rugoviane që të distancohen nga udhëheqja aktuale, të cilët i cilësoi si uzurpatorë që interesin e shtetit e lënë në fund të rendit të ditës. Shteti nuk është në shitje!/lajmishqip.net