Samiti i liderëve evropianë do të mbahet të enjten në Granada të Spanjës, ndërkaq pjesëmarrës në këtë samit do të jenë edhe presidentja e Republikës së Kosovës, Vjosa Osmani dhe presidenti i Serbisë, Aleksandar Vuçiq.
Presidentja Osmani tashmë ka konfirmuar pjesëmarrjen në këtë samit.
Ndryshe, të dielën e 24 shtatorit ndodhi një sulm terrorist ndaj Policisë së Kosovës në Banjskë të Zveçanit.
Policia u sulmua nga një grup serbësh prej më shumë se 30 personash. Pjesëmarrës në grupin terrorist ishte edhe ish nënkryetari i Listës serbe, Milan Radoiçiq person ky shumë i afërt me presidentin serb, Vuçiq.
Ndërkaq, ministri i Punëve të Brendshme i Kosovës, Xhelal Sveçla ka publikuar një video ku Radoiçiq shihet në sulmin terrorist ndaj Policisë së Kosovës.
Disa ditë pas publikimit të kësaj video, vetë Radoiçiq ka pranuar pjesëmarrjen në sulm dhe tërë organizimin logjistik. Pasi u konfirmua pjesëmarrja e tij në sulm, ai dha dorëheqje nga pozita e nënkryetarit të partisë Lista serbe.
E disa ditë pas sulmit terrorist në Banjskë, të enjten në Spanjë mbahet samiti i liderëve evropianë, ku pjesëmarrës janë Osmani dhe Vuçiq.
Mediumi britanik “The Guardian” referuar burimeve shkruan se ka përpjekje për t’i takuar Osmanin dhe Vuçiqin.
“Vuçiq dhe Osmani do të marrin pjesë në samitin e liderëve evropianë në Granadë të Spanjës dhe burimet thonë se ka përpjekje që t’i ulin ata së bashku në një dhomë përkundër armiqësisë politike ndërmjet dy vendeve”, shkruan TheGuardian.