Këngëtari Alban Ramosaj, ka treguar së fundmi përmes rrjeteve sociale se kënga e tij hit me titull “Theje” është vjedhur nga malazezët.
Përkatësisht, këngëtari malazez Emel Fenca e ka vjedhur dhe përvetësuar atë këngë, duke e titulluar “Vrati je”, që në gjuhën serbo-malazeze do të thotë “Kthehu pas”.
I frustruar me të parë këtë, Ramosja reagoi në InstaStory, duke publikuar kopjen e këngës së tij të famshme.
“Kopja është forma më e lartë e të të komplimentuarit. Por të vjedhin ‘Theje’ në këtë llojforme?…”, shkroi Albani.
Tutje, ai etiketoi artistin interpretues të këngës “Vrati je”, i cili tek autorët e melodisë ka vendosur emrin e vet, gjoja se është këngë e “kompozuar” nga vet ai.
“Ermal Franca, ti dhe i ashtuquajturi grupi yt kreativ duhet të jeni të turpëruar. Më shumë për faktin se ju jeni një reprezantues në Eurovision në të njëjtën kohë që ‘Theje’ u publikua”, ka shkruar tutje këngëtari nga Kosova.
Emel është pjesë e grupit malazes D-Mol, të cilët përfaqësuan Malin e Zi në ‘Eurovision 2019’ me këngën “Heaven”, por dështuan ta kualifikonin vendin e tyre në finale.
“Jam kaq i lodhur duke ‘mbyllur gojën’ që të mos përzihem me energji ‘arrogante’ apo ‘të pasjellshme’. Por është bërë kaq e lodhshme…Duke nisur me ju ‘artistet’ të po vendit tonë (e dini mirë se kush jeni) e duke vazhduar me tipa si puna e këtij që postova më herët. Po si more vëlla e quani veten kreativë apo artistë? A s’keni një çikë dinjitet? Na mbytet, na e shpifët. Keni humbur fillin, themelin dhe arsyen për çfarë e keni nisur këtë rrugëtim që quhet muzikë”, ka shkruar Ramosaj më tej në reagimin e tij.
Pjesë e grupi D-Mol ka qenë edhe këngëtari malazez i lindur në Kosovë, Riki Feratovic, i cili aso kohe në një intervistë për Telegrafin kishte folur për historinë e tij dhe të familjes së tij.
Kënga “Theje” e Alban Ramosajt ishte gjithashtu pretendente për të prezantuar Shqipërinë në ‘Eurovision 2022’, por u mund nga Ronela Hajati me këngën ‘Sekret’ në Festivalin e RTSh-së në dhjetor të vitit 2021, e cila dështoi ta kualifikonte vendin në finale në maj të 2022-s./Telegrafi