Pellgu i Drinit të Bardhë po përballet me lëkundje të niveleve të ujit, ku disa rrjedha shënojnë rënie të lehta, ndërsa të tjera janë në rritje e sipër, ka bërë të ditur Instituti Hidrometeorologjik i Kosovës (IHMK).
Sipas monitorimit të fundit nga IHMK, rrjedha e poshtme e Drinit të Bardhë ka arritur aktualisht kuotat maksimale. Ky fenomen vjen si pasojë direkte e reshjeve të dendura të ditëve të fundit dhe procesit të kullimit nga sistemet ujore përreth.
Në zonën qendrore të vendit, lumenjtë si Ibri dhe Sitnica, së bashku me degët e tyre, po reflektojnë një rënie graduale të nivelit. Megjithatë, përjashtim bën lumi Llap, i cili sipas matjeve të fundit është ende në fazën e ngritjes së nivelit të ujit.
Ndërkohë, të dhënat tregojnë se në të gjitha rrjedhat lumore të pellgut të Moravës së Binçës po vërehen ngritje të lehta. Një situatë e ngjashme po mbizotëron edhe në pellgun e Lepencit, ku nivelet e ujit po pësojnë rritje.
Ekspertët e IHMK-së theksojnë se këto luhatje mbeten ngushtësisht të varura nga kushtet atmosferike, sasia e reshjeve dhe intensiteti i tyre në zona të ndryshme të Kosovës./lajmishqip.net