Një grup i zëshëm eurodeputetësh i ka drejtuar një letër zyrtare presidentit të Këshillit Evropian, ku i kërkojnë Ursula von der Leyenit dhe Komisares Marta Kos shfuqizimin e menjëhershëm të të gjitha masave ndëshkuese ndaj Kosovës. Nismëtari i këtij presioni diplomatik, eurodeputeti Riho Terras, bëri të ditur se ky dokument është nënshkruar nga një numër i konsiderueshëm kolegësh të tij.
“Sanksionet e BE-së nuk po godasin elitën politike, por shoqërinë civile, bizneset e vogla, arsimin dhe sektorin vital të energjisë. Ky ndëshkim duhet të marrë fund pa asnjë vonesë”, ka deklaruar ai përmes një reagimi në rrjetin social X.
Në përmbajtjen e letrës, anëtarët e Parlamentit Evropian insistojnë që masat e vendosura në vitin 2023 të shfuqizohen tërësisht. Sipas tyre, metodat që Komisioni Evropian aplikoi ndaj Kosovës ishin të padrejta, jashtë çdo proporcioni dhe krejtësisht kundërproduktive që në fillesat e tyre. Ato nuk e kanë arritur asnjë objektiv real, përveçse kanë zbehur besimin e opinionit publik kosovar ndaj vetë Bashkimit Evropian.
Pasojat negative të këtyre masave po prekin thellë indin e shoqërisë kosovare në dimensione të shumta. Nga organizatat e shoqërisë civile te projektet kulturore, nga bizneset e mesme te stabiliteti energjetik, dëmi i shkaktuar nga këto kufizime të panevojshme po bëhet i papërballueshëm.
Edhe spektrat kryesorë politikë në Prishtinë kanë alarmuar Komisionin Evropian për dëmet e pariparueshme të këtyre sanksioneve. Çdo pretendim se heqja e tyre tani mund të interpretohet si akt i politizuar për shkak të zgjedhjeve të ardhshme, vlerësohet nga eurodeputetët si tërësisht i paqëndrueshëm.
Viti 2025 është dëshmuar si një periudhë tejet e vështirë dhe me turbulenca politike për shtetin e Kosovës. Që prej zgjedhjeve të shkurtit, vendi është përballur me mungesën e një Kuvendi dhe Qeverie me mandat të plotë funksional. Megjithatë, vitaliteti i demokracisë u dëshmua sërish në nivelin lokal gjatë zgjedhjeve të tetorit të këtij viti.
Përderisa pesha e sanksioneve rëndon mbi jetën e qytetarëve dhe jo mbi ekzekutivin, ndëshkimi i popullit duhet të ndërpritet përmes shfuqizimit 100% të masave. Një tërheqje e pjesshme prej 50% nuk konsiderohet e mjaftueshme. Rrjedhimisht, kërkohet që Komisioni Evropian t’u japë fund masave para mbajtjes së zgjedhjeve të 28 dhjetorit 2025 ./lajmishqip.net