Deputeti i Lëvizjes Vetëvendosje, Enver Dugolli, i ftuar në emisionin “Click” në RTV21, ka bërë të ditur se pushteti mbetet i hapur për të trajtuar me seriozitet çdo propozim konkret që vjen nga tabori opozitar sa i përket çështjes së presidentit. Ai garantoi se çdo emër i ofruar do të shqyrtohet me përgjegjësi deri në finalizimin e plotë të këtij procesi.
Sipas tij, vëmendja është e përqendruar te dy partitë kryesore opozitare. Dugolli theksoi se sapo këto subjekte të dalin me qëndrime apo emra të qartë, procesi do të marrë një udhë zyrtare dhe institucionale për të gjetur një zgjidhje të qëndrueshme.
“Në momentin që pranojmë propozime konkrete, veçanërisht nga dy grupet më të mëdha opozitare, ne do t’i shqyrtojmë ato me seriozitetin më të lartë për t’i dhënë fund kësaj çështjeje,” u shpreh ai gjatë bisedës në studio.
Dugolli hodhi dritë edhe mbi përpjekjet e kaluara, duke deklaruar se ftesat për bashkëpunim drejtuar PDK-së dhe LDK-së kanë nisur shumë herët, madje edhe përpara se të merrej vendimi nga Gjykata Kushtetuese. Megjithatë, sipas tij, reagimet nga këto parti nuk kanë qenë në frymën e duhur të bashkëpunimit.
“Kemi kërkuar dialog me të dyja partitë, por kemi marrë vetëm përgjigje hezituese me arsyetimin se ‘po presin’,” deklaroi deputeti i mazhorancës. Ai e mbylli reagimin e tij me një kritikë të ashpër, duke vlerësuar se ka një mungesë të theksuar sinqeriteti dhe se opozita ende nuk po tregon interes real për zgjidhjen e nyjës së presidentit. /lajmishqip.net