Sot, në ambientet e Kuvendit të Kosovës, pritet të zhvillohet një aktivitet i ngjeshur i komisioneve parlamentare, ku fokus kryesor do të jenë reformat në sektorin e energjisë, mbikëqyrja e financave publike dhe proceset e rekrutimit për organet drejtuese të institucioneve të pavarura.
Me nisje nga ora 09:00, Komisioni Ad-hoc për përzgjedhjen e anëtarëve të Bordit të RTK-së do të nisë fazën e intervistimit të kandidatëve potencialë. Paralelisht, Komisioni për Ekonomi do të analizojë në parim Projektligjin për Energjinë Elektrike, një dokument kyç për rregullimin e këtij sektori strategjik në vend.
Ndërkaq, në orën 11:00, vëmendja do të zhvendoset te Komisioni për Buxhet, i cili do të shqyrtojë Kornizën Afatmesme të Shpenzimeve (KASH) për periudhën 2027-2029, krahas raporteve vjetore të shpenzimeve të Kuvendit dhe atij financiar të Avokatit të Popullit për vitin 2025.
Në të njëjtën orë, Komisioni për Legjislacion do të vijojë me procesin e vlerësimit, duke intervistuar kandidatët që synojnë të bëhen pjesë e Këshillit Gjyqësor të Kosovës./lajmishqip.net
