Shefi i Agjencisë Ndërkombëtare për Energji Bërthamore (IAEA), Rafael Grossi, ka dhënë një paralajmërim të ashpër se rreziku i një konflikti bërthamor është “më i madh sot sesa në të kaluarën”. Në një intervistë për të përditshmen italiane La Repubblica, ai parashikoi një të ardhme me 20 deri në 25 shtete me armë bërthamore.
Sipas Grossit, ky rrezik në rritje shpjegohet me bllokimin e procesit të çarmatimit global, si dhe me faktin se shtetet aktuale bërthamore po prodhojnë më shumë armë, përfshirë Kinën. Ai gjithashtu theksoi si shqetësues rritjen e retorikës për përdorimin e sulmeve bërthamore taktike.
Ai shprehu shqetësim për synimin e disa shteteve për të blerë armë bërthamore, megjithëse nuk mundi t’i përmendë me emra. “Këto janë shtete të rëndësishme në Azi dhe Gjirin Persik,” tha ai, duke theksuar se “një botë me 20-25 shtete të pajisura me armë bërthamore është diçka e paparashikueshme dhe e rrezikshme”.
Aktualisht, vetëm nëntë shtete njihen se posedojnë armë bërthamore. Pesë prej tyre janë anëtare të përhershme të Këshillit të Sigurimit të OKB-së: Shtetet e Bashkuara, Rusia, Mbretëria e Bashkuar, Franca dhe Kina. Katër shtetet e tjera janë India, Pakistani, Koreja e Veriut dhe Izraeli. Së bashku, këto vende besohet se kanë një arsenal prej rreth 12,000 armësh bërthamore, nga të cilat rreth 10,700 i përkasin SHBA-së dhe Rusisë./lajmishqip.net
