Gazeta prestigjioze “The Wall Street Journal” ka bërë të ditur se presidenti i Shteteve të Bashkuara, Donald Trump, është duke analizuar seriozisht mundësinë për dislokimin e 10 mijë forcave të reja tokësore në rajonin e Lindjes së Mesme.
Ky përforcim i mundshëm ushtarak synon t’i ofrojë Shtëpisë së Bardhë një gamë më të gjerë opsionesh operacionale, në një kohë kur administrata Trump po peshon paralelisht mundësinë e bisedimeve diplomatike me Teheranin zyrtar.
Sipas agjencisë së lajmeve “Reuters”, këto njësite pritet të përbëhen kryesisht nga këmbësoria dhe njësitë e blinduara, të cilat do të përforconin kontingjentin prej rreth 5000 marinsave amerikanë që janë tashmë të pranishëm në atë zonë.
Megjithëse destinacioni i tyre fiks mbetet ende i papërcaktuar, ndërmarrja e këtij hapi po interpretohet nga analistët si një paralajmërim i qartë për përgatitjen e një ofensive të mundshme tokësore brenda territorit të Iranit.
Ky shtim masiv i trupave po shqyrtohet në një periudhë mjaft delikate, kur lideri 79-vjeçar deklaron publikisht se SHBA-ja po kërkon të arrijë një marrëveshje përfundimtare me Iranin për të mbyllur kapitullin e luftës.
Nga ana tjetër, zyrtarët në Teheran vazhdojnë të refuzojnë një takim të nivelit të lartë me Uashingtonin, duke e parë presionin diplomatik amerikan si një manovër taktike dhe jo si një vullnet të sinqertë për paqe /lajmishqip.net