Këshilli i Marrëdhënieve Shqiptaro-Amerikane (AARC) ka përshëndetur sinjalet e fundit nga Shtetet e Bashkuara për rinisjen e Dialogut Strategjik me Kosovën, ndonëse ky proces ende nuk është formalizuar plotësisht.
Përmes një letre zyrtare, AARC konstaton se raportet dypalëshe janë lëkundur nga sfida të rënda, përfshirë bllokimin e fondeve të MCC-së dhe ngrirjen e komunikimit strategjik, si pasojë e atyre që Uashingtoni i cilësoi si veprime “të njëanshme” të palës kosovare.
“Rikthimi i dialogut zyrtar do të dëshmonte vullnetin e të dyja vendeve për të ecur përpara me një koordinim më të ngushtë dhe konstruktiv”, vlerëson AARC.
Organizata nënvizon se zgjedhjet e fundit në Kosovë jo vetëm që dëshmuan pjekuri demokratike, por shpërfaqën edhe irritimin e publikut ndaj një presioni ndërkombëtar që shpesh u konsiderua i padrejtë.
“Kjo pakënaqësi qytetare duhet të analizohet me seriozitet nga SHBA-të gjatë hartimit të angazhimit të ri strategjik. Zgjedhjet krijuan një mandat të qartë për të konsoliduar institucionet, duke ofruar mundësinë për të ndërtuar marrëdhënie më të qëndrueshme me Uashingtonin. Ekziston një interes jetik për një Kosovë sovrane dhe të fortë, sidomos në kohën e kërcënimeve nga Lindja, ku roli i Prishtinës si partner besnik mbetet kritik. Mbështetja e vazhdueshme ushtarake amerikane, edhe në kohë krizash diplomatike, tregon një përkushtim që kërkon një përgjigje serioze politike nga Kosova”.
Njëkohësisht, AARC insiston se Kosova duhet të dëshmojë maturi, duke sugjeruar se një vizitë zyrtare e kryeministrit Albin Kurti në Uashington është hapi i domosdoshëm për të konfirmuar vullnetin për rregullimin e raporteve.
“Synimi i SHBA-ve për rivendosjen e Dialogut Strategjik është një akt vullneti i mirë. Tani i takon Kosovës të përgjigjet me një gjest kuptimplotë, ku thelbi duhet të jetë realizimi i vizitës së vonuar të Kryeministrit Kurti në kryeqendrën amerikane. Kosova duhet të kapitalizojë mbi punën e palodhshme të Presidentes Osmani në ruajtjen e këtyre lidhjeve, duke e shtrirë këtë angazhim në të gjitha nivelet qeveritare. Vetëm kështu mund të sigurohen rezultate të prekshme nga kapitulli i ri i bashkëpunimit. AARC mbetet e gatshme për mbështetje dhe inkurajon qeverinë e re që ta shfrytëzojë këtë momentum për forcimin e partneritetit strategjik të bazuar në respekt të ndërsjellë dhe interesa të përbashkëta”./lajmishqip.net
