Marrëveshja për rrugën drejt normalizimit të raporteve ndërmjet Kosovës dhe Serbisë, e dakorduar në shkurt të vitit 2023 nën ombrellën e Bashkimit Evropian, vlerësohet si një kthesë pozitive drejt stabilitetit, ku të dyja palët “duhet të synojnë progres të menjëhershëm në jetësimin e Aneksit të kësaj marrëveshjeje”.
Ky qëndrim është i sanksionuar në Aktin për Autorizimin e Mbrojtjes Kombëtare (NDAA), i cili sapo u miratua nga dy dhomat e Kongresit dhe u nënshkrua nga presidenti i Shteteve të Bashkuara, Donald Trump, më 18 dhjetor, njofton REL.
“Pas arritjes së një progresi të prekshëm, SHBA-ja duhet të shqyrtojë hapa konkretë për forcimin e raporteve bilaterale me të dyja vendet”, theksohet në dokumentin ligjor, duke saktësuar se kjo nënkupton nisjen e dialogut strategjik dypalësh dhe nisma për thellimin e investimeve dhe lidhjeve ekonomike.
Dokumenti dikton që SHBA-ja duhet të mbajë kursin e mbështetjes për një marrëveshje gjithëpërfshirëse finale mes Kosovës dhe Serbisë mbi parimin e njohjes së ndërsjellë, duke refuzuar prerazi shkëmbimet territoriale, ndarjet apo ndryshimet e kufijve mbi baza etnike në Ballkanin Perëndimor. Uashingtoni zotohet për përkrahjen e demokracive pluraliste si mjeti i vetëm për të evituar rikthimin e dhunës etnike në rajon.
Ky ujdi prej 11 pikash, i njohur si Marrëveshja e Ohrit, mes tjerash përcakton një nivel vetëmenaxhimi për serbët e Kosovës, pranimin e simboleve shtetërore, zotimin e Serbisë për të mos penguar anëtarësimin e Kosovës në arenën ndërkombëtare, si dhe kërkon zbatimin e të gjitha akteve të kaluara të dialogut.
Akti Kombëtar i Mbrojtjes për vitin fiskal 2026 zyrtarizon një buxhet rekord prej 901 miliardë dollarësh për ushtrinë amerikane, shifër kjo që tejkalon me 8 miliardë dollarë kërkesën fillestare të Presidentit Trump.
Ky ligj voluminoz rregullon çdo detaj ushtarak, që nga blerja e anijeve, avionëve dhe sistemeve raketore, e deri te rritja e pagave për personelin ushtarak dhe strategjitë për adresimin e rreziqeve të reja gjeopolitike.
Teksti i ligjit vë në shënjestër edhe varësinë energjetike të Ballkanit Perëndimor nga resurset ruse, duke e cilësuar këtë si një prangë që lidh politikat e rajonit me Moskën dhe saboton integrimin evropian. Aty theksohet se korrupsioni i rrënjosur, edhe në nivelet më të larta politike, mbetet pengesa kryesore për prosperitetin ekonomik dhe politik të këtyre vendeve.
Në fund, Akti nënvizon se reduktimi i varësisë së Ballkanit nga gazi rus është prioritet i interesit kombëtar të SHBA-së, ndërsa rikonfirmon se Uashingtoni duhet të jetë motori i anëtarësimit të vendeve të rajonit në Bashkimin Evropian dhe në NATO ./lajmishqip.net