Sot shënohen nëntë vjet nga vdekja e aktivistit të Lëvizjes Vetëvendosje, Astrit Dehari, rast i cili edhe pas kaq shumë kohësh vazhdon të mbetet i pazbardhur.
Në përvjetorin e ndarjes së tij nga jeta, kryeministri në detyrë dhe kryetari i VV-së, Albin Kurti, bëri homazhe pranë varrit të Astritit, duke theksuar nevojën urgjente për drejtësi dhe angazhim më të madh të institucioneve të drejtësisë.
“I bëjmë thirrje sistemit të drejtësisë të bëjë më tepër dhe të angazhohet, sepse ky krim është një plagë e hapur – jo vetëm për familjen Dehari dhe Lëvizjen Vetëvendosje, por për të gjithë popullin e Kosovës dhe Republikën tonë,” tha Kurti gjatë homazheve.
Homazhe në kujtim të Astrit Deharit bënë edhe kryetari i Kuvendit të Kosovës, Dimal Basha, ministrja në detyrë e Drejtësisë, Albulena Haxhiu, si dhe deputetja Shqipe Mehmeti-Selimi, të cilët kërkuan që rasti të mos mbetet peng i mosveprimit institucional.
Dehari, aktivist i devotshëm i Vetëvendosjes, vdiq në nëntor të vitit 2016 në qendrën e paraburgimit në Prizren, në rrethana ende të paqarta, ndërsa familja dhe shokët e tij kanë vazhduar prej vitesh kërkesën për zbardhjen e plotë të rastit./lajmishqip.net