Kryeministri izraelit, Benjamin Netanyahu, i ka paraqitur një falje zyrtare Katarit për bombardimin e Dohas në fillim të këtij muaji, në një sulm që synonte eliminimin e zyrtarëve të Hamasit.
Sipas burimeve të afërta me liderin izraelit, të cituara nga mediat ndërkombëtare, Netanyahu ka zhvilluar një bisedë telefonike me Kryeministrin e Katarit, Mohammed bin Abdulrahman Al Thani. Telefonata u bë nga Shtëpia e Bardhë, menjëherë pas takimit të tij me Presidentin amerikan Donald Trump, i cili gjithashtu kishte komunikuar me autoritetet e Katarit më herët gjatë ditës.
Ky hap vjen si përgjigje ndaj sulmit ajror izraelit që goditi kryeqytetin e Katarit, ku grupi militant Hamas ka prej kohësh selinë e tij politike.
Në kohën e incidentit, Katari, një aleat i rëndësishëm i Shteteve të Bashkuara, e kishte dënuar ashpër sulmin duke e cilësuar atë si “frikacak” dhe si një “shkelje flagrante të të gjitha ligjeve dhe normave ndërkombëtare”./lajmishqip.net
