Prokuroria Speciale e Kosovës ka ngritur një aktakuzë për spiunazh me detaje tronditëse, duke akuzuar një person me inicialet H.S. se ka shërbyer si informator i Agjencisë së Inteligjencës së Serbisë (BIA), madje edhe gjatë kohës kur ishte pjesë e organizatës terroriste ISIS në Siri.
Sipas aktakuzës, i pandehuri H.S., i cili në nëntor të vitit 2015 i ishte bashkuar ISIS-it në Siri, dyshohet se nga atje i ka dërguar BIA-s informacione të klasifikuara. Këto të dhëna përfshinin numrin e shqiptarëve në radhët e ISIS-it, mënyrën e organizimit të tyre dhe zonat ku ata vepronin.
Bashkëpunimi me inteligjencën serbe, që dyshohet se ka nisur që nga viti 2009, nuk u ndal as pas kthimit të tij në Kosovë dhe vuajtjes së dënimit me burg për terrorizëm. Prokuroria thekson se pas lirimit, H.S. ka vazhduar takimet në Serbi me zyrtarë të lartë të BIA-s, përfshirë Drejtorin për Luftimin e Terrorizmit, I.B. Për shërbimet e tij, i akuzuari paguhej rregullisht me shuma deri në 700 euro në muaj.
Personi në fjalë u arrestua më 6 maj 2025 dhe Prokuroria Speciale ka kërkuar nga Gjykata vazhdimin e masës së paraburgimit. Organi i akuzës kërkon që pas përfundimit të shqyrtimit gjyqësor, i pandehuri të shpallet fajtor dhe të dënohet sipas ligjeve në fuqi. /lajmishqip.net
