Dhjetëra efektivë policie kanë mbetur të plagosur gjatë trazirave të dhunshme që shpërthyen në qytetin italian të Bolonjës. Protestat e ashpra pasuan vdekjen tragjike të Abderrahim Fakir, një shtetasi me origjinë marokene, i cili humbi jetën gjatë momentit kur po mbahej me forcë nga forcat e rendit.
Përballe kësaj ngjarjeje të rëndë, Prokuroria ka nisur menjëherë një hetim zyrtar për vrasje të paqëllimshme, ku po hetohen oficerët e policisë si dhe personeli mjekësor i pranishëm në vendngjarje.
Mijëra qytetarë u mblodhën të hënën në mbrëmje në qendër të Bolonjës me thirrjet për “drejtësi për Abderrahim Fakir”. Ndonëse manifestimi nisi në mënyrë paqësore, situata degjeneroi kur një grup prej rreth 100 protestuesish u përlesh me policinë dhe u vu flakën dy automjeteve. Sipas bilancit zyrtar të autoriteteve, gjatë trazirave u lënduan 64 pjestarë të forcave të rendit.
Kryeministrja e Italisë, Giorgia Meloni, reagoi duke deklaruar se është mjaft e rëndësishme të zbardhet e vërteta e plotë mbi rrethanat e vdekjes së Fakirit, por nënvizoi se “asgjë nuk mund të shërbejë si arsyetim për dhunën ndaj forcave të rendit”.
Incidenti tragjik ndodhi të dielën në lagjen Pilastro të Bolonjës, pasi policia mori një telefonatë nga një banor që raportonte se Fakiri po shfaqte sjellje të çrregullta dhe po godiste dyert e garazheve. Sipas versionit zyrtar të policisë, efektivët u përpoqën fillimisht ta qetësonin atë, por më pas përdorën sprej me piper për ta neutralizuar.
Një video e publikuar në mediat italiane shfaq pamjet ku dy policë qëndrojnë mbi Fakirin, i cili ndodhet i shtrirë me fytyrë përmbys në tokë duke u kërkuar vazhdimisht atyre të ndalojnë.
Në ato pamje dallohet gjithashtu edhe një civil që i mban këmbët, ndërkohë që ekipi i ndihmës së shpejtë qëndron pranë vendngjarjes. Pas rreth dy minutash, Fakiri pushon së rezistuari dhe humbet ndjenjat. Oficerët i vendosin prangat në duar e këmbë, por më pas konstatojnë se ai nuk po reagonte më.
Prokurorët e Bolonjës kanë hapur hetime të thelluara për të përcaktuar nëse përdorimi i forcës nga ana e policisë dhe veprimet e ekipit mjekësor kanë ndikuar drejtpërdrejt në vdekjen e 42-vjeçarit.
Nga ana tjetër, disa dëshmitarë okularë deklaruan për mediat italiane se Fakiri ndodhej në gjendje të rënduar psikologjike, por ishte i paarmatosur dhe nuk përbënte kërcënim për askënd.
“Nuk mund të përfundojë jetën askush në këtë mënyrë. Ata e vranë pa asnjë mëshirë dhe unë kërkoj vetëm të vërtetën“, u shpreh mes lotësh motra e tij, Khadija Fakir.
Kryebashkiaku i Bolonjës, Matteo Lepore, e cilësoi videon si thellësisht tronditëse dhe organizoi një tubim në mbështetje të familjes së viktimës. Gjatë protestës fjalën e mori edhe mbesa e Fakirit, Yossra, e cila theksoi se xhaxhai i saj “meritonte ndihmë, të dëgjohej dhe të trajohej me dinjitet”.
Pas përplasjeve të dhunshme, Lepore sqaroi se shumica e qytetarëve u mblodhën në mënyrë paqësore për të shprehur solidaritet me familjen, ndërsa incidentet e rënda u shkaktuan nga një grup i vogël që zgjodhi rrugën e dhunës.
Në krahun tjetër, sekretari i përgjithshëm i sindikatës së policisë italiane, Domenico Pianese, mbrojti veprimet e efektivëve, duke deklaruar se, nisur nga pamjet e publikuara, ndërhyrja u realizua në përputhje me procedurat. Ai gjithashtu kritikoi organizimin e protestës menjëherë pas ngjarjes, duke argumentuar se kjo i dha hapësirë grupeve radikale për t’u përplasur me policinë.
Hetimet intensive për zbardhjen e vdekjes së Abderrahim Fakir po vazhdojnë, ndërsa autoritetet pritet të analizojnë me kujdes edhe pamjet e regjistruara nga kamerat trupore të efektivëve për të sqaruar çdo detaj të këtij incidenti./lajmishqip.net
