Presidenti amerikan Donald Trump ka deklaruar se “nuk e di kush është Changpeng Zhao”, pavarësisht se vetëm muajin e kaluar e kishte falur manjatin miliarder të kriptovalutave.
Gjatë një interviste për programin “60 Minutes” të CBS News, Trump u pyet për vendimin e tij, duke thënë me ton ironik:
“Në rregull, a jeni gati? Nuk e di kush është ai.”
Changpeng Zhao, i njohur si “CZ”, ishte shpallur fajtor në vitin 2023 për mundësim të pastrimit të parave, duke vuajtur katër muaj burg dhe dorëhequr nga posti i drejtorit ekzekutiv të Binance, platforma më e madhe e kriptovalutave në botë.
Edhe pse Trump pretendoi se nuk e njeh Zhaon, kompanitë e këtij të fundit kanë partneritete me firma të lidhura me familjen Trump, përfshirë Dominari Holdings, e vendosur në Trump Tower, ku djemtë e presidentit shërbejnë si këshilltarë.
Kur gazetarja Norah O’Donnell e pyeti se pse e kishte falur pavarësisht paralajmërimeve të prokurorëve për “rrezik ndaj sigurisë kombëtare të SHBA-së”, Trump tha se i ishte thënë që Zhao ishte “viktimë e një gjuetie shtrigash nga administrata e Bidenit”.
Në intervistë, ai mbrojti gjithashtu mbështetjen për kriptovalutat, duke theksuar se “Shtetet e Bashkuara duhet të jenë lidere në këtë industri, përndryshe do t’ua lëmë epërsinë Kinës dhe rivalëve tanë”.
Falja e presidentit heq ndalimin që e pengonte Zhaon të drejtonte biznese financiare, por ende mbetet e paqartë nëse kjo ndikon në marrëdhëniet e tij me rregullatorët amerikanë apo në rolet e tij brenda Binance.
Ndërkohë, Shtëpia e Bardhë ka deklaruar se rasti ishte “i ndjekur penalisht në mënyrë të tepruar” nga administrata Biden, ndërsa Trump “ka korrigjuar një padrejtësi të qartë përmes autoritetit të tij kushtetues”.
Platforma Binance mbetet bursa më e madhe globale për tregtimin e aseteve dixhitale./lajmishqip.net