Ministri i mbrojtjes i Kroacisë, Ivan Anushiq, i ka dhënë një përgjigje të prerë presidentit serb Aleksandar Vuçiq, i cili ripërsëriti pretendimet e tij të pabazuara se bashkëpunimi ushtarak mes Kroacisë, Kosovës dhe Shqipërisë po kërcënon sigurinë e Serbisë.
Kreu i shtetit serb e riktheu në diskurs këtë aleancë rajonale pikërisht në momentin kur paralajmëroi planet e reja për armatimin intensiv të forcave të tij ushtarake.
Gjatë së mërkurës, Anushiq njoftoi zhvillimin e një takimi zyrtar me ministrin e mbrojtjes të Shqipërisë, Ermal Nuka. Sipas tij, ky takim shërben si një rikonfirmim i miqësisë së palëkundur dhe i aleancës strategjike ndërshtetërore mes dy vendeve.
Ai potencoi se të dyja shtetet ndajnë vizionin e përbashkët për paqe, siguri dhe stabilitet në Europën Juglindore, duke thelluar mbi këto parime edhe koordinimin në rritjen e kapaciteteve mbrojtëse.
“Lidhur me pyetjet e vazhdueshme për reagimet nga Beogradi, përgjigja mbetet e pandryshuar – ka përfunduar koha kur dikush tentonte t’i diktonte Kroacisë, si shtet sovran dhe anëtar i NATO-s e BE-së, se si ta orientojë politikën e saj. Një situatë e tillë nuk do të tolerohet më kurrë./lajmishqip.net