Ushtria e Shteteve të Bashkuara konfirmon se ka kryer sulme ndaj pozicioneve raketore iraniane pranë Ngushticës strategjike të Hormuzit, duke përdorur bomba të fuqishme depërtuese ndaj bunkerëve.
Përmes një njoftimi në platformën X, Komanda Qendrore e SHBA-së bëri të ditur se forcat amerikane kanë shfrytëzuar suksesshëm municione të shumëfishta prej 5,000 paundësh për depërtim të thellë në lokacionet e fortifikuara të raketave iraniane përgjatë bregdetit të ngushticës.
Sipas ushtrisë amerikane, raketat iraniane kundër anijeve në këto zona paraqitnin një kërcënim të drejtpërdrejtë për transportin ndërkombëtar detar në këtë rrugëkalim.
Bllokimi faktik i kësaj rruge ujore jetike nga ana e Iranit, ku kalon afër 20% e furnizimeve globale me naftë, ka shkaktuar ndërprerje serioze të trafikut detar dhe ka ndikuar në rritjen e çmimeve të naftës në mbarë botën.
Këto bomba gjigante, të njohura si “shkatërrues bunkerësh” dhe me kosto rreth 288,000 dollarë për njësi, janë megjithatë më pak të fuqishme se bombat prej 30,000 paundësh (13,600 kg) të përdorura nga SHBA-të vitin e kaluar gjatë sulmeve ndaj tre centraleve bërthamore nëntokësore në Iran.
Për dallim nga municionet konvencionale, bombat depërtuese të bunkerëve nuk janë dizajnuar për të shpërthyer në ajër, tokë apo në sipërfaqen e një objektivi, por janë të rrethuara me çelik të rëndë e të fortë për t’u futur thellë nëntokë para detonimit /lajmishqip.net