Në prag të protestës gjithëkombëtare që do të mbahet nesër në Tiranë në mbështetje të ish-krerëve të UÇK-së, Lëvizja Vetëvendosje ka ashpërsuar tonet ndaj kryeministrit të Shqipërisë, Edi Rama. Ndonëse mbështet tubimin, LVV thekson se qëndrimi i saj historik kundër Gjykatës Speciale nuk ka ndryshuar dhe kërkon pendesë nga ata që lobuan për themelimin e saj.
Në një reagim zyrtar, partia në pushtet në Kosovë ka veçuar rolin e kryeministrit shqiptar. “Një shembull i qartë është vet Kryeministri aktual i Shqipërisë, Edi Rama, i cili kishte ardhur në Kosovë në vizitë emergjente me helikopter për të bindur palët që të votonin pro themelimit të Gjykatës Speciale,” shkruan LVV.
Sipas Vetëvendosjes, Shqipëria duhet t’i përdorë forumet ndërkombëtare si OKB dhe Këshilli i Evropës për ta ngritur këtë çështje, duke ironizuar se përgjegjësitë institucionale nuk zëvendësohen me protesta në shesh.
Kjo deklaratë vjen në një kohë kur kryeministri Rama ka intensifikuar kritikat e tij ndaj Speciales në arenën ndërkombëtare. Ai ka folur vazhdimisht në OKB dhe veçanërisht në Këshillin e Evropës, ku ka kërkuar tërheqjen e plotë të raportit të Dick Marty-t, duke e cilësuar atë si të pabazë dhe të padrejtë ndaj luftës së UÇK-së./lajmishqip.net
