Deputeti i Lëvizjes Vetëvendosje, Egzon Azemi, së bashku me zëdhënësin e këtij subjekti politik, Arlind Manxhuka, janë shpallur fajtorë për veprën penale të nxitjes së përçarjes dhe mosdurimit. Trupi gjykues ka shqiptuar një dënim prej një vit e gjashtë muaj burgim efektiv për secilin prej tyre.
Menjëherë pas shpalljes së këtij aktvendimi, deputeti Azemi ka reaguar publikisht, duke hedhur akuza të rënda mbi sistemin e drejtësisë. Sipas tij, ky proces gjyqësor ishte i pabazuar dhe dënimi u dha në mungesë të plotë të provave materiale.
Azemi ka bërë një krahasim të ashpër mes trajtimit të tyre dhe personave që ai i cilëson si kriminelë. “Ata që lirojnë terroristët serbë që hedhin bomba, po synojnë të na dënojnë neve, aktivistët shqiptarë, vetëm sepse guxuam të reagonim ndaj këtij skandali,” u shpreh ai në mesazhin e tij.
Ai ka vazhduar kritikën duke e cilësuar sistemin aktual të drejtësisë si të vjetruar dhe të nënshtruar ndaj interesave të jashtme. Përveç tij dhe Manxhukës, ai përmendi edhe dënimet me nga gjashtë muaj për Edi Zenelajn dhe Qerim Elshanin, duke e llogaritur këtë si një goditje kolektive prej katër vitesh burgim për ata që reagojnë ndaj kriminelëve.
Në mbyllje të reagimit të tij, deputeti i pushtetit theksoi se asnjë lloj presioni apo “çanta që vijnë matanë kufirit” nuk do të mund t’ia heshtin zërin. Ai e përfundoi deklaratën me një thirrje për Republikën e Kosovës, duke i cilësuar vendimet e gjykatës si një turp për ata që, sipas tij, po lirojnë kriminelet dhe po dënojnë reagimin qytetar. /lajmishqip.net