NASA ka publikuar të dhëna të reja që tregojnë se asteroidi 2024 YR4 mund të përbëjë një rrezik për disa nga rajonet më të populluara nëse do të godiste Tokën.
Sipas Euronews, përcjell Telegrafi, trajektorja e mundshme e asteroidit përfshin një “korridor rreziku” që shtrihet përgjatë Oqeanit Paqësor lindor, Amerikës së Jugut veriore, Oqeanit Atlantik, Afrikës, Detit Arabik dhe Azisë Jugore.
Disa nga qytetet që ndodhen në këtë trajektore janë Bogotá në Kolumbi (me mbi 11.6 milionë banorë), Mumbai në Indi (me 18.4 milionë banorë) dhe Dhaka në Bangladesh (me mbi 23.9 milionë banorë).
NASA ka rritur vlerësimin e rrezikut të përplasjes së asteroidit në vitin 2032, duke e vendosur probabilitetin në 3.1%, një përqindje më e lartë se çdo asteroid i zbuluar deri më sot. Ky është një rritje nga 2.3%, shifra që ishte raportuar më pak se dy javë më parë.
Agjencia Evropiane e Hapësirës (ESA) vlerëson gjithashtu një probabilitet prej 2.8%, që tejkalon rrezikun e asteroidit Apophis, i cili fillimisht mendohej se mund të godiste Tokën në vitin 2029, por më vonë u përjashtua si mundësi.
2024 YR4 u zbulua më 27 dhjetor 2024 nga një teleskop i financuar nga NASA në Rio Hurtado, Kili, pas një afrimi të afërt me Tokën në Krishtlindje. Në atë kohë, shkencëtarët thanë se ishte e vështirë të parashikohej me saktësi trajektorja e tij.
Ndërsa madhësia e saktë e asteroidit mbetet e panjohur, vlerësimet sugjerojnë se ai mund të ketë një diametër midis 40 dhe 90 metra.
NASA ka njoftuar se do të vazhdojë të vëzhgojë asteroidin deri në prill, pas së cilës ai do të largohet nga Toka dhe nuk do të jetë më i monitorueshëm deri në qershor 2028.