Kryetari i Aleancës për Ardhmërinë e Kosovës, Ramush Haradinaj, ka përshëndetur vendimin zyrtar të Bahamasit, i cili u rreshtua si shteti i 121-të që njeh pavarësinë dhe sovranitetin e Republikës së Kosovës.
Përmes një reagimi në rrjetet sociale, Haradinaj vlerësoi se ky hap konfirmon fuqizimin e vazhdueshëm të shtetësisë sonë në rrafshin ndërkombëtar. Sipas tij, ky akt dëshmon qartë se aspirata euroatlantike e Kosovës është një proces i drejtë, legjitim dhe tashmë i pakthyeshëm.
Më tej, kreu i AAK-së theksoi se pozita ndërkombëtare e Kosovës po avancohet me hapa të sigurt, duke e profilizuar vendin tonë si një faktor stabiliteti dhe një partner serioz për paqen dhe sigurinë në rajon e më gjerë.
Postimi i plotë i z. Haradinaj:
“Një tjetër arritje e rëndësishme për diplomacinë tonë. Bahamasi i bashkohet sot listës së vendeve që njohin Kosovën, duke u bërë shteti i 121-të që pranon realitetin tonë shtetëror. Ky veprim është një dëshmi e qartë se konsolidimi i Kosovës në arenën botërore po ndodh çdo ditë e më shumë, duke vërtetuar se rruga jonë drejt familjes euroatlantike është e palëkundur.
Kosova ka hyrë në një fazë të re të avancimit ndërkombëtar dhe nuk ka asnjë forcë që mund ta ndalë këtë proces. Flamuri i Republikës sonë do të vazhdojë të lartësohet, duke dëshmuar se jemi një shtet sovran dhe një kontribues aktiv për sigurinë dhe stabilitetin global.
Urime Kosovë!”/lajmishqip.net