Senati amerikan ka votuar pro një rezolute që synon t’i ndalojë Presidentit Donald Trump ndërmarrjen e veprimeve të mëtejshme ushtarake kundër Venezuelës pa autorizimin paraprak të Kongresit. Sipas agjencisë Reuters, kjo lëvizje vjen vetëm pak ditë pas operacionit dramatik në Caracas, ku forcat amerikane kapën Presidentin venezuelian, Nicolas Maduro.
Në një kthesë të rrallë kundër liderit republikan, Senati avancoi të enjten masën për kufizimin e kompetencave presidenciale mbi dërgimin e trupave në luftë pa miratim legjislativ. Votimi rezultoi 52 pro dhe 47 kundër, ku pesë senatorë republikanë thyen rreshtat partiakë për t’u bashkuar me demokratët.
Ky reagim i ashpër pason operacionin ushtarak të së shtunës së kaluar për kapjen e Maduros. Ndonëse kundërshtarët e rezolutës e cilësojnë aksionin si zbatim të ligjit – për shkak të akuzave për drogë dhe armë që rëndojnë mbi Maduron në SHBA – shumë ligjvënës alarmuan se kjo mund të jetë hyrje në një “luftë të pafundme” pa plan dhe autorizim.
Kush janë “rebelët” republikanë që sfiduan Trumpin?
Pesë senatorët që votuan për kufizimin e fuqisë së Presidentit janë:
-
Rand Paul (Kentucky)
-
Susan Collins (Maine)
-
Josh Hawley (Missouri)
-
Lisa Murkowski (Alaska)
-
Todd Young (Indiana)
Reagimi i Presidentit Trump ishte i menjëhershëm. Përmes rrjetit “Truth Social”, ai deklaroi se këta senatorë “nuk duhet të zgjidhen kurrë më”, duke shtuar se republikanët duhet të turpërohen që po tentojnë t’i heqin kompetencat për mbrojtjen e Amerikës.
Përtej rastit të Venezuelës, ligjvënësit mbeten të shqetësuar nga retorika e fundit e administratës. Kapja e Maduros ka rritur frikën se mund të ndërmerren veprime të ngjashme ushtarake për marrjen e Grenlandës, ose ndaj vendeve si Kuba, Kolumbia dhe Irani.
Lideri demokrat, Chuck Schumer, akuzoi Trumpin se po sinjalizon angazhime afatgjata ushtarake dhe financiare pa autorizim, veçanërisht pas kërkesës së Presidentit për rritjen e shpenzimeve ushtarake në 1.5 trilionë dollarë.
Pavarësisht kësaj fitoreje në Senat, rezoluta përballet me sfida: ajo duhet të kalojë në Dhomën e Përfaqësuesve të kontrolluar nga republikanët dhe nevojiten dy të tretat e votave për të anuluar veton e pritur presidenciale. Debati final pritet të mbahet javën e ardhshme. /lajmishqip.net