Ministri i Drejtësisë i Sirisë, Mazhar al-Wais, deklaroi se qeveria e re ka iniciuar kërkesën për ekstradimin e ish-presidentit Bashar al-Assad dhe bashkëpunëtorëve të tij të ngushtë, si pjesë e procesit të drejtësisë tranzicionale.
Ky njoftim pason vendimin e presidentit aktual, Ahmad al-Sharaa, i cili nënshkroi dekretin për amnisti të përgjithshme, duke lënë jashtë saj të gjitha krimet e rënda të kryera kundër popullit sirian. Sipas të dhënave zyrtare, përafërsisht 1,500 të burgosur janë liruar tashmë, ndërkohë që qindra mijëra të tjerë pritet të përfitojnë nga ky akt faljeje.
Wais potencoi se asnjë individ përgjegjës për krime lufte apo mizori nuk do të tolerohet nga amnistia, duke paralajmëruar se drejtësia siriane do t’i ndjekë penalisht të gjithë fajtorët përmes procedurave ligjore vendore dhe ndërkombëtare.
Në anën tjetër, Assad, i cili ushtroi pushtet absolut për rreth dy dekada e gjysmë, thuhet se ka gjetur strehim në Rusi që nga fundi i vitit 2024, duke shënuar kështu kolapsin e sundimit shumëvjeçar të Partisë Baath./lajmishqip.net