Presidenti i Turqisë, Recep Tayyip Erdogan, është i gatshëm të luajë rolin e nikoqirit në bisedimet që mund të zhvillohen për përfundimin e luftës mes Ukrainës dhe Rusisë, duke theksuar se Turqia mund të luajë një rol kyç në ndihmën për arritjen e një marrëveshje paqësore.
“Turqia do të ishte një mikpritës ideal për bisedimet e mundshme mes Rusisë, Ukrainës dhe Amerikës në të ardhmen e afërt”, deklaroi lideri turk pas një takimi me presidentin ukrainas, Volodymyr Zelensky, duke shfaqur angazhimin për të ndihmuar në gjetjen e një zgjidhjeje diplomatike për këtë konflikt të gjatë dhe të dhimbshëm.
Në këtë kuadër, Erdogan vlerësoi bisedimet e mëparshme mes Rusisë dhe Ukrainës që u mbajtën në Turqi gjatë vitit 2022, duke i cilësuar ato si “një pikë referimi të rëndësishme dhe një platformë ku palët e përfshira u afruan më shumë për të arritur një marrëveshje”.
Këto bisedime, sipas tij, treguan mundësinë e një zgjidhjeje përmes dialogut dhe kompromisit, shkruan skynews.
Gjithashtu, Erdogan theksoi mbështetjen e Turqisë për integritetin territorial të Ukrainës, një qëndrim që ka qenë një element kyç i politikës së jashtme të Ankarasë në këtë periudhë të tensionuar ndërkombëtarisht.
Ky angazhim tregon solidaritetin e Turqisë me Ukrainën në një moment kur lufta po vazhdon të ketë pasoja të rënda për popullin dhe shtetin ukrainas.
Ndryshe, Arabia Saudite ishte nikoqir i bisedimeve të para mes SHBA-së dhe Rusisë, por nuk ishte prezent Ukraina./Telegrafi