Safet Kamberi është zgjedhur sonte Kryesues i Kuvendit Komunal të Mitrovicës, duke siguruar 18 vota për, përballë 10 votave kundër dhe 2 fletëvotimeve të pavlefshme. Zgjedhja e tij erdhi gjatë një seance të jashtëzakonshme të mbajtur në orët e vona të mbrëmjes.
Seanca, e cila nisi në orën 21:30, ishte parashikuar fillimisht të mbahej nesër në mëngjes. Megjithatë, ndryshimi i menjëhershëm i orarit u bë me qëllim të respektimit të rreptë të afateve ligjore të parashikuara nga Ligji për Vetëqeverisje Lokale, Udhëzimet Administrative të MAPL-së dhe Statuti i Komunës së Mitrovicës.
Ky nxitim procedural doli të ishte i domosdoshëm, pasi seanca konstituive ishte zhvilluar më 12 dhjetor 2025. Sipas kornizës ligjore në fuqi, zgjedhja e Kryesuesit të Kuvendit duhet të finalizohet jo më larg se një muaj pas konstituimit të tij, duke e bërë këtë mbledhje sonte vendimtare për legjitimitetin e institucionit. /lajmishqip.net