Ka nisur aksioni për rrënimin e objekteve të ndërtuara pa leje në pronën e Ndërmarrjes Publike Hidroekonomike “Ibër-Lepenc” afër Liqenit të Ujmanit, ku në mesin e tyre renditen edhe dy vila që, sipas burimeve të KosovaPress-it, janë në pronësi të kryesuesit të Kuvendit Komunal të Mitrovicës së Veriut, Ivan Zaporozhac, si dhe vëllait të tij.
Aksioni i gjerë ka startuar të martën në mëngjes me kërkesë të vetë ndërmarrjes “Ibër-Lepenci”, me qëllim lirimin e hapësirave të uzurpuara brenda parcelave që gëzojnë statusin e pronës publike.
Kryeshefi ekzekutiv i “Ibër-Lepencit”, Faruk Mujka, ka konfirmuar për KosovaPress se ky operacion po realizohet nga Inspektorati i Ministrisë së Mjedisit, Planifikimit Hapësinor dhe Infrastrukturës.
“Inspektorati i Ministrisë së Ambientit është duke e zhvilluar këtë aksion”, deklaroi prerazi Mujka.
Ai bëri të ditur se që nga data 3 korrik, 11 personave që kishin ngritur ndërtime pa leje në pronat e “Ibër-Lepencit” u zenë afat për zbrazjen e objekteve dhe lirimin e tyre përfundimtar jo më larg se deri më 17 korrik.
Nga ana tjetër, edhe zëvendësdrejtori i Policisë së Kosovës për rajonin e veriut, Veton Elshani, konfirmoi për KosovaPress se njësitë policore po asistojnë në terren për të garantuar mbarëvajtjen e plotë të aksionit.
Ky ndërhyrje vjen menjëherë pas ultimatumit të mëhershëm të ndërmarrjes “Ibër-Lepenci”, e cila u kishte bërë thirrje zyrtare 11 individëve që kishin ngritur shtëpi pushimi dhe struktura të tjera ilegale që t’i lironin ato brenda afatit të caktuar kohor. /lajmishqip.net
