Ish-deputeti i Lëvizjes Vetëvendosje, Florin Krasniqi, duke reflektuar mbi suksesin e radhës të Albin Kurtit dhe ish-partisë së tij, ka shpallur rikthimin e tij aktiv, duke e krahasuar politikën me një ndeshje sportive.
Ai theksoi se në këtë përballje nuk ka rëndësi zhurma, por kush zbret në fushën e blertë. Sipas Krasniqit, fitoret korren nga ata që janë në lojë dhe jo nga spektatorët në tribuna. Pas një kohe si vëzhgues, ai ka vendosur të futet sërish në fushë, duke e cilësuar këtë si një moment vendimtar.
“Tash që unë dhe Partia Socialdemokrate jemi pjesë e lojës, do të shohim se kush është lojtar i vërtetë,” deklaroi ai. Krasniqi u shpreh i bindur se përfshirja e tij dhe e socialdemokratëve do të ndryshojë plotësisht rrjedhën dhe dinamikën e skenës politike në vend.
Mesazhi i tij nuk i drejtohet vetëm PSD-së, por ka si synim mobilizimin e të gjithë socialdemokratëve të Kosovës. Ai beson se ky grupim ka potencialin për të krijuar një forcë të re dhe të qëndrueshme përballë sfidave aktuale.
Në fund, gjatë bisedës në emisionin “Debat Plus”, Krasniqi shtoi se bashkimi i të gjithë socialdemokratëve do të jetë lëvizja kryesore për të rrëzuar atë që ai e cilësoi si “pushtet keqbërës”, duke paralajmëruar një betejë të fortë politike. /lajmishqip.net