Sot, qytetarët hungarezë i janë drejtuar kutive të votimit në një proces elektoral që mund të shënojë fundin e dominimit 16-vjeçar të Viktor Orbanit. Kjo kthesë historike pritet të ketë impakt të ndjeshëm në Rusi dhe të provokojë lëkundje të forta në qarqet e krahut të djathtë ndërkombëtar, duke përfshirë edhe mbështetësit e Donald Trumpit në SHBA.
Orban, i njohur si një nacionalist euroskeptik, ka projektuar modelin e “demokracisë joliberale”, një skemë e vlerësuar lart nga lëvizja MAGA e Trumpit dhe admiruesit e tij në Evropë, raporton Reuters. Megjithatë, pakënaqësia po rritet brenda vendit; shumë hungarezë ndihen të zhgënjyer pas tre vitesh stanjacioni ekonomik, rritjes së kostove të jetesës dhe raporteve për pasurimin e pashpjegueshëm të oligarkëve pranë qeverisë.
Anketat e opinionit publik gjatë dy javëve të fundit kanë dëshmuar një rënie të ndjeshme për partinë Fidesz të Orbanit. Sipas të dhënave, ajo rezulton aktualisht shtatë deri në nëntë pikë përqindjeje pas lëvizjes “Tisza”, partia e re e qendrës së djathtë e udhëhequr nga Peter Magyar.
Procesi për zgjedhjen e 199 anëtarëve të parlamentit nisi në agim dhe qendrat e votimit u mbyllën në mbrëmje. Pjesëmarja ka qenë e jashtëzakonshme; deri në orët e mesditës, mbi 54 për qind e votuesve kishin hedhur votën e tyre, duke shënuar kështu një rekord historik që nuk ishte parë në dy dekadat e fundit.
Ndërkohë, këto zhvillime po ndiqen me interes teksa në Islamabad po zhvillohen bisedime mes zyrtarëve amerikanë dhe iranianë me ndërmjetësimin e Pakistanit. Teherani vazhdon të qëndrojë i palëkundur në kushtet e tij përpara nisjes së negociatave direkte për përfundimin e konfliktit.
“Po i bëjmë botës një nder”
Në këtë kontekst, Donald Trump ka deklaruar se SHBA-të po nisin procesin e pastrimit të Ngushticës së Hormuzit nga minat. Ai theksoi se ky veprim vjen si një “shërbim për botën”, duke përfshirë importuesit e mëdhenj të energjisë si Kina, Japonia dhe vendet evropiane.
Gjatë fjalimit të tij, Trump kritikoi ashpër Iranin, duke pretenduar se fuqia ushtarake e Teheranit është dobësuar seriozisht. Ai nuk kurseu as aleatët, duke i akuzuar ata për mungesë vullneti për të garantuar sigurinë në rrugët kryesore detare.
Së fundi, ai paralajmëroi se Irani nuk duhet të tentojë vendosjen e tarifave për kalimin e tankerëve në Ngushticën e Hormuzit. Kjo zonë mbetet pika qendrore e krizës globale të energjisë për shkak të tensioneve të vazhdueshme. /lajmishqip.net