Presidenti i Kroacisë, Zoran Milanoviq, ka marrë vendim për anulimin e samitit të krerëve të shteteve të Ballkanit Perëndimor, Kroacisë dhe Sllovenisë, i cili ishte paraparë të mbahej gjatë muajit maj në ishullin kroat të Brijonit.
Si arsye kryesore për këtë anulim, Milanoviq ka vlerësuar se aktualisht nuk ekzistojnë kushtet e nevojshme për ta ftuar në këtë takim presidentin serb, Aleksandar Vuçiq, duke u bazuar në retorikën e tij të ditëve të fundit.
Sipas njoftimit të lëshuar nga zyra e Presidentit të Kroacisë, të cilin e citon “Jutarnji list”, qëndrimet dhe veprimet e fundit politike të Vuçiqit bien në ndesh të plotë me synimet e Procesit Brdo-Brijoni, duke minuar raportet ndërshtetërore dhe sigurinë rajonale në Evropën Juglindore. Presidenti Milanoviq ka konstatuar se në rrethana të tilla vizita e presidentit serb në tokën kroate është e pamundur dhe nuk ka premisë për sukses.
Ky zhvillim vjen pas samitit të kaluar të mbajtur vjeshtën e kaluar në Tiranë, ku kishin marrë pjesë të gjithë liderët e rajonit, përfshirë edhe vetë presidentin e Serbisë./lajmishqip.net
