Ali Mohammad Naini, zëdhënës i Gardës Revolucionare të Iranit (IRGC), ka hedhur poshtë kategorikisht deklaratat e Uashingtonit, sipas të cilave fuqia detare iraniane është asgjësuar tërësisht.
“Ngushtica strategjike e Hormuzit mbetet nën autoritetin tonë absolut, andaj çdo akt agresioni do të ndeshë në një kundërpërgjigje dërrmuese,” deklaroi ai për agjencinë e lajmeve, Tasnim.
Përfaqësuesi i IRGC-së i quajti po ashtu të pabaza pretendimet e fundit të presidentit amerikan, Donald Trump, lidhur me shpartallimin e flotës detare të Teheranit.
“Nëse Trumpi pretendon se marina jonë nuk ekziston më, atëherë le të provojë t’i sjellë anijet e tij në Gjirin Persik, nëse vërtet guxon,” citohet të ketë thënë ai për Al Jazeera.
Zyrtari iranian bëri të ditur se që nga nisja e konfliktit, Teherani ka lëshuar rreth 700 raketa dhe 3,600 dronë në drejtim të shënjestrave “amerikane dhe sioniste”.
Ai shtoi një paralajmërim se posedojnë arsenal akoma më të rëndë që nuk është vënë në funksion, duke u zotuar për sulme të vazhdueshme deri në rikthimin e plotë të balancës parandaluese.
Ndërkohë, presidenti Donald Trump kishte pohuar paraprakisht se Irani po kërkon me ngulm një marrëveshje paqeje, por ai e ka refuzuar atë pasi konsideron se kushtet aktuale nuk janë të favorshme.
Trump deklaroi gjithashtu asgjësimin e ishullit Kharg, pikës kyçe të naftës, duke ironizuar se goditjet mund të përsëriten, ndërsa insiston se forcat detare iraniane janë neutralizuar plotësisht./lajmishqip.net
