Teherani zyrtar do të shënjestrojë qendrën bërthamore izraelite, Dimona, në rast se Izraeli dhe Shtetet e Bashkuara tentojnë ndryshimin e dhunshëm të pushtetit në Iran, ka raportuar të mërkurën agjencia gjysmëzyrtare iraniane ISNA, duke u thirrur në një zyrtar të lartë ushtarak, transmeton agjencia e lajmeve “Reuters”.
Reaktori i Dimonës, i njohur zyrtarisht si Qendra për Hulumtime Bërthamore “Shimon Peres Negev”, është i lokalizuar në thellësi të shkretëtirës së Negevit, rreth 13 kilometra në juglindje të qytetit homonim.
Ndonëse Izraeli insiston zyrtarisht se ky kompleks shërben ekskluzivisht për “qëllime kërkimore shkencore”, raportimet e inteligjencës sugjerojnë se ky reaktor ka qenë i angazhuar drejtpërdrejt në prodhimin e materialeve të nevojshme për programin e armatimit bërthamor të shtetit izraelit.
Besohet se Izraeli ka arritur të prodhojë armët e para bërthamore që në vitin 1967, ndërsa vlerësimet ndërkombëtare tregojnë se arsenali i tyre aktual luhatet diku mes 80 dhe 400 koka bërthamore./lajmishqip.net
