Kryeministri Albin Kurti ka përshëndetur miratimin e buxhetit të shtetit, duke e cilësuar atë si një lajm të shkëlqyer për Republikën dhe qytetarët e saj.
Përmes një reagimi publik, kreu i qeverisë shprehu mirënjohjen ndaj deputetëve që votuan pro, duke theksuar se vërejtjet dhe kritikat e opozitës nuk do të injorohen, por do të trajtohen me kujdes gjatë rishikimit të ardhshëm.
Ndonëse ky buxhet ishte paraparë të kalonte në fund të vitit të kaluar, dokumenti i miratuar kap vlerën e rreth 4 miliardë eurove dhe sjell lehtësira të ndjeshme. Kurti detajoi se 867 milionë euro janë ndarë ekskluzivisht për komunat, ndërsa një pikë kyçe mbetet përfshirja e pagës së 13-të për punonjësit e sektorit publik.
Po ashtu, buxheti i ri sjell ndryshimin e shumëpritur që dyfishon shtesën për përvojën e punës nga 0.25 në 0.50 për qind për 15 vitet e para. Ndërkohë, qeveria ka vendosur të shtyjë afatin e zbatimit të tatimit progresiv në pronë, në pritje të një ligji të ri që do të hartohet në bashkëpunim me pushtetin lokal.
Përtej këtyre, kryeministri theksoi se pakoja financiare garanton fonde të shtuara për barnat esenciale, kulturën dhe sportin. Ndërkohë, në fokus të veçantë mbetet edhe rritja e mbështetjes për sipërmarrësit privatë, bujqit dhe investimet strategjike në infrastrukturën publike./lajmishqip.net