Shkruan: Demir Reshiti
Në historinë e mërgatës shqiptare në Zvicër, suksesi shpesh vjen si fryt i një rruge të gjatë integrimi, përkushtimi dhe pune të palodhur ndër breza. Sot, kjo histori po vazhdon të shkruhet me emra të rinj, të cilët po rriten mes dy kulturave, duke marrë më të mirën prej tyre. Një nga këta emra premtues është edhe Ajan Qusaj, vetëm 11 vjeç, por me një profil sportiv që tashmë po tërheq vëmendje në futbollin zviceran.
Me rritjen e fluksit të emigrantëve pas viteve ’90, shtetet perëndimore zhvilluan programe integrimi që u mundësuan gjeneratave të reja arsimim, punësim dhe avancim profesional. Pikërisht nga ky proces lindi brezi i dytë i mërgatës shqiptare, i cili jo vetëm u integrua me sukses, por në shumë raste arriti kulme të larta akademike e profesionale. Një përfaqësues i denjë i këtij brezi është dr. Ylber Qusaj, nga fshati Pllajnik i Opojës.
I diplomuar në Strasburg të Francës dhe i punësuar në kantonin Aargau të Zvicrës, dr. Ylber Qusaj është shquar për veprimtarinë e tij shkencore, duke u bërë një nga personalitetet më të respektuara në fushën e tij në Zvicër dhe më gjerë. Krahas angazhimit profesional, ai është tejet aktiv në jetën kulturore të mërgatës shqiptare dhe aktualisht ushtron funksionin e kryetarit të Shoqatës Kulturore Shqiptare në Fricktal, duke dhënë një kontribut të vazhdueshëm në ruajtjen e identitetit kulturor shqiptar.
Rrugës së përkushtimit dhe suksesit të prindit po ecën tashmë edhe i biri, Ajan Qusaj, pjesëtar i brezit të tretë të mërgatës. Javën që shkoi, Ajani hapi një kapitull të ri në zhvillimin e tij sportiv duke iu bashkëngjitur skuadrës Old Boys, një klub me traditë në futbollin zviceran, i njohur për filozofinë e tij të fortë në edukimin sportiv, disiplinën dhe zhvillimin afatgjatë të futbollistëve të rinj.
Talenti i Ajanit nuk ka kaluar pa u vënë re. Gjatë vitit të kaluar, ai është përzgjedhur nga FC Basel për të qenë pjesë e programit rajonal njëvjeçar Footeco FC Basel, një strukturë elitare për identifikimin dhe zhvillimin e talenteve të reja. Paralelisht, Ajani ka qenë aktiv edhe me FC Stein, ku ka ndërtuar bazën e tij sportive dhe ka fituar përvojë të rëndësishme konkurruese.
Edhe pse ka pasur interesim konkret dhe oferta nga klube si FC Aarau dhe FC Frick, si dhe dy ftesa gjatë vitit 2024 nga përzgjedhjet kantonale të talenteve të reja
në Aargau, vendimi i Ajanit dhe familjes së tij ka qenë i qartë: zhvillim gradual, stabilitet dhe përgatitje afatgjatë, me synimin e ruajtur drejt FC Basel.
Në korrik të vitit të kaluar, Ajani mori pjesë në AC Milan Academy Junior Camp Prishtina, ku me bashkëmoshatarët e tij mësoi, u stërvit dhe shijoi çdo moment me pasion dhe buzëqeshje.
Nga aspekti teknik, Ajani dallohet për aftësinë për të luajtur me të dyja këmbët, kontroll të avancuar të topit, shkathtësi teknike dhe shpejtësi në situata ofensive. Ai aktivizohet kryesisht si sulmues dhe vlerësohet si një lojtar me potencial të dukshëm për të ardhmen.
Me përkushtim, punë të vazhdueshme dhe mbështetje të fortë familjare, Ajan Qusaj po ndërton hap pas hapi profilin e tij si sportist i ri, duke kombinuar zhvillimin teknik me formimin e karakterit. Bashkimi me një klub si Old Boys përfaqëson një fazë të rëndësishme në këtë rrugëtim dhe një sinjal të qartë se e ardhmja e tij sportive po ndërtohet mbi baza të shëndosha.
Në një moshë kaq të re, Ajani tashmë është dëshmi se talenti, kur shoqërohet me disiplinë dhe vizion, mund të shndërrohet në premtim serioz për futbollin zviceran, e njëkohësisht në krenari për komunitetin shqiptar në mërgatë.
