Shtetet e Bashkuara pritet të luajnë një “rol kyç” në ofrimin e garancive të sigurisë për Ukrainën, duke kërkuar njëkohësisht një angazhim aktiv dhe të drejtpërdrejtë nga ana e Evropës.
Sekretari i Shtetit i SHBA-së, Marco Rubio, i bëri këto komente të mërkurën gjatë dëshmisë në Komitetin për Marrëdhënie me Jashtë të Senatit, teksa raportonte mbi zhvillimet globale, raporton Ukrinform.
Gjatë interpelancës me senatorët, Rubio vuri në dukje ekzistencën e një konsensusi të gjerë për vendosjen e mundshme të një kontingjenti të kufizuar trupash evropiane, kryesisht nga Franca dhe Britania e Madhe, të mbështetur fuqishëm nga SHBA-të.
Ai sqaroi se arkitektura e ardhshme e sigurisë për Ukrainën do të ketë mbështetjen amerikane, mirëpo vetëm forcat evropiane do të kenë prani fizike me trupa në terren.
Në të njëjtën kohë, Rubio potencoi se vetë implikimi i SHBA-së përbën thelbin e sigurisë, pasi pa peshën e Uashingtonit, dislokimi i forcave evropiane në Ukrainë do të ishte i parëndësishëm.
Ai insistoi se mekanizmi amerikan i sigurisë është në fakt garancia reale, pa dashur të minimizojë gatishmërinë e disa shteteve evropiane për të dërguar trupa pas përfundimit të luftës.
Më tej, ai shtoi se thjesht po nënvizonte faktin që pa mbrojtjen dhe logjistikën amerikane, asnjë iniciativë tjetër nuk do të kishte peshë ekzekutive.
Kjo situatë vjen si pasojë e faktit se, sipas Rubios, aleatët dhe partnerët e SHBA-së kanë dështuar të investojnë mjaftueshëm në kapacitetet e tyre mbrojtëse gjatë tri dekadave të fundit.
Tani, ekziston shpresa që kjo neglizhencë ndaj mbrojtjes do të ndryshojë rrënjësisht, shtoi ai në fund të fjalës së tij.
Megjithatë, Sekretari Rubio nuk dha detaje specifike se çfarë do të përmbajë konkretisht ky mekanizëm i garancisë së sigurisë që do të ofrojnë SHBA-të./lajmishqip.net
