Procesi i numërimit të votave të arritura me postë po i afrohet fazës përfundimtare në Qendrën e Numërimit dhe Rezultateve. Sipas të dhënave zyrtare të përditësuara nga Komisioni Qendror i Zgjedhjeve, deri më tani janë procesuar 61.96% e fletëvotimeve, ku vërehet një avantazh i ndjeshëm i njërës prej forcave politike.
Në krye të listës radhitet bindshëm Lëvizja Vetëvendosje, e cila ka siguruar 72.55% të mbështetjes, që përkthehet në 11 mijë e 786 vota. Kjo shifër konfirmon mbështetjen e gjerë që ky subjekt gëzon në mesin e votuesve nga jashtë vendit.
Ndërkohë, subjekti i dytë më i votuar është Lidhja Demokratike e Kosovës, e cila ka arritur të mbledhë 1 mijë e 761 vota, ose 10.84% të totalit të deritashëm. Garën e vijon Partia Demokratike e Kosovës, e cila renditet në vendin e tretë me 1 mijë e 299 vota, që përbëjnë saktësisht 8% të votave të numëruara.
Në pozitën e katërt ndodhet Aleanca për Ardhmërinë e Kosovës, e cila ka marrë 861 vota, apo 5.30% të mbështetjes nga procesi i votimit me postë. Numërimi po vijon me intensitet deri në zbardhjen e plotë të rezultatit për këtë kategori votuesish. /lajmishqip.net
