Zëvendëssekretari i Shtetit i SHBA-së, Christopher Landau, ka reaguar zyrtarisht përmes platformës X lidhur me operacionin ushtarak amerikan të ndërmarrë në kryeqytetin e Venezuelës, Karakas. Landau ka shpërndarë njoftimin e presidentit Donald Trump, duke i dhënë një vulë diplomatike aksionit që tronditi rajonin.
Në mesazhin e tij, Landau ishte i prerë: ai deklaroi se ish-udhëheqësi Nicolas Maduro do të përballet tashmë me drejtësinë për krimet e kryera gjatë regjimit të tij. Ky reagim pason njoftimin e bujshëm të kësaj të shtune nga ana e Presidentit Trump, i cili konfirmoi se homologu i tij venezuelian është kapur dhe është larguar forcërisht nga vendi.
Sipas deklaratës së Shtëpisë së Bardhë, Shtetet e Bashkuara ekzekutuan një sulm ushtarak në shkallë të gjerë mbi objektivat strategjike në Venezuelë. Operacioni rezultoi me arrestimin e Maduros, i cili së bashku me bashkëshorten e tij, është transportuar me avion jashtë territorit venezuelian për të vijuar me procedurat e mëtejshme. /lajmishqip.net
