Presidentja e Republikës së Kosovës, Vjosa Osmani, u është drejtuar qytetarëve me një mesazh urimi për Vitin e Ri 2026. Ajo ka vënë theksin te nevoja për të reflektuar mbi rrugëtimin e vitit që po mbyllet, duke u bërë thirrje të gjithëve për një angazhim të përbashkët drejt një të ardhmeje më të sigurt dhe më të zhvilluar.
Në fjalën e saj, Osmani e cilësoi vitin 2025 si një epokë sfidash komplekse, por edhe si një periudhë ku Kosova shënoi përparime domethënëse në konsolidimin e pozitës së saj ndërkombëtare. Ajo nënvizoi se vendi tregoi një qëndrueshmëri të lartë në mbrojtjen e rendit kushtetues dhe interesave shtetërore, duke u konfirmuar si një faktor stabiliteti dhe partner i besueshëm në arenën globale.
E para e shtetit nuk la pa përmendur kontributin e jashtëzakonshëm të punëtorëve, pjesëtarëve të Policisë e Ushtrisë, mësimdhënësve, mjekëve, rinisë, grave dhe mërgatës sonë, të cilët ishin shtylla e përballjes me sfidat e vitit që po lemë pas.
Për sa i përket vitit 2026, Presidentja deklaroi se Kosova hyn në këtë kapitull të ri me përgjegjësi të shtuara dhe synime strategjike. Këto prioritete përfshijnë forcimin e shtetit të së drejtës, ngritjen e parametrave të sigurisë, avancimin e mëtejmë diplomatik, mbështetjen e vazhdueshme për familjet dhe rininë, si dhe rritjen ekonomike.
Në përfundim, ajo uroi që viti 2026 të sjellë shëndet, paqe dhe begati për çdo familje, duke përmbyllur: “Le të jetë ky një vit i sukseseve individuale dhe i Republikës sonë. Gëzuar Vitin e Ri për Kosovën dhe të gjithë qytetarët e saj!” /lajmishqip.net
